• full_e2677dfc98

    ॲसिड पिडीतांना शासनातर्फे आता पाच लाख रूपयांची मदत मिळणार

    वरळी येथील नॅशनल स्पोर्टस क्लब ऑफ इंडिया येथे आयोजित राज्य महिला आयोग आणि दिव्यज फौंडेशनतर्फे महिला दिनानिमित्त सक्षमा या कार्यक्रमाचे आयोजन करण्यात आले होते. या कार्यक्रमात बोलताना मुख्यमंत्री देवेंद्र फडणवीस म्हणाले, ॲसीड हल्ल्यातील पिडीतांचे पुनर्वसन करण्याबरोबरच त्यांचा आत्मविश्वास वाढविणे गरजेचे आहे. राज्य महिला आयोग आणि दिव्यज फाउंडेशनचे कार्य कौतुकास्पद आहे. राज्य महिला आयोगाने ॲसिड पिडीतांसाठी एक योजना सादर करावी. शासन योजनेची अंमलबजावणी करेल. ॲसीड हल्लेखोरांना जास्तीत जास्त कडक शिक्षा व्हावी याकरिता कायदे देखील कडक करण्यात येत आहेत. या पिडींतांना ॲसिड हल्ल्याचे बळी न म्हणता त्यांनी या हल्ल्याशी चार हात करत त्यावर मात केली असेच म्हणावे लागेल. अभिनेता विवेक ओबेरॉय यांनी ॲसिड पिडीतेला घर आणि नोकरी देऊन खऱ्या अर्थाने सामाजिक बांधिलकी जपली आहे. आपण सर्व क्षेत्रातील मान्यवर सक्षमा या कार्यक्रमाचा एक भाग झालात ही आनंदाची गोष्ट आहे.

    महिला व बालविकास मंत्री पंकजा मुंडे म्हणाल्या, ॲसिड हल्ल्यातील व्यक्ती खचून न जाता आत्मविश्वासाने उभ्या राहिल्या आहेत. राज्य महिला आयोग आणि दिव्यज फाऊंडेशन यांनी या क्षेत्रात केलेले कार्य स्तुत्य आहे. सक्षमा कार्यक्रमामुळे पिडीतांमध्ये नक्की आत्मविश्वास निर्माण होईल. राज्य शासन पिडीतांच्या पाठीशी आहे. ॲसिड हल्लेखोरांना कडक शिक्षा होण्यासाठी शासन प्रयत्नशील आहे.

    प्रास्ताविकात राज्य महिला आयोगाच्या अध्यक्षा विजया रहाटकर म्हणाल्या, ॲसिड हल्ल्यावर मात करत ताठ मानेने आपले आयुष्य जगणाऱ्यांना आत्मविश्वास देण्यासाठी सक्षमा कार्यक्रमाचे आयोजन करण्यात आले होते.

    अमृता फडणवीस म्हणाल्या, ॲसिड पिडीतांना आत्मविश्वास देण्यासाठी आयोजित केलेल्या कार्यक्रमाच्या माध्यमातून पिडीतांचे पुर्नवसन करून त्यांना जगण्याची उमेद देण्याच्या कामात शासनाबरोबरच प्रशासनाचीही जबाबदारी महत्वाची आहे. हल्लेखोरांना जास्तीत जास्त शिक्षा व्हावी यासाठी कायदे कठोर व्हावेत अशी मागणीही त्यांनी यावेळी केली.

    यावेळी रॅम्पवॉकमधून जनजागृती व्हावी या उद्देशाने पिडीतांसोबत महिला व बाल विकास मंत्री पंकजा मुंडे, महापालिका आयुक्त अजोय मेहता, अमृता फडणवीस, दिवीजा फडणवीस, मुंबई पोलीस आयुक्त दत्ता पडसळगीकर, अभिनेता विवेक ओबेरॉय, अभिनेत्री जुही चावला, सोनाली बेंद्रे, साक्षी तन्वर, दिव्या खोसला, वंदना गुप्ता, सुधा शर्मा, संगीतकार अनु मलिक यांनी रॅम्पवॉक केले.

    यावेळी महिला व बाल विकास मंत्री पंकजा मुंडे यांच्या हस्ते सक्षमा या पुस्तकाचे प्रकाशन करण्यात आले. तसेच ॲसिड हल्ल्यातील पिडीतांच्या पुनर्वसनाकरिता कार्यरत असणा-या संस्था आणि व्यक्तींचा मुख्यमंत्र्यांच्या हस्ते पुष्पगुच्छ आणि सन्मानचिन्ह देवून गौरव करण्यात आला.

    यावेळी पिडीतांचे मनोधैर्य वाढविण्याकरिता, एक माहितीपट दाखविण्यात आला. तसेच अमृता फडणवीस यांनी स्वरबद्ध केलेल्या गीताने उपस्थितांची मने जिंकली. मान्यवरांनी पिडीतांचा आत्मविश्वास वाढविण्यासाठी यावेळी संदेश दिले. (सौजन्य – महान्युज)

  • 16640541_1248263651925860_8240831079326116881_n

    बीडच्या विकासासाठी नाही तर मुंडेंना रोखण्यासाठी बारामतीने बीडला आमदार दिले – ना. पंकजाताई मुंडे

    जिल्हा परिषदेत भाजपची सत्ता आणण्याचे केले आवाहन

    आष्टी / शिरूर / पाटोदा दि. 11 ——बीड जिल्हयाच्या विकासाशी बारामतीला काहीही देणेघेणे नाही, त्यांनी बीडला आमदार दिले ते लोकनेते गोपीनाथराव मुंडे साहेबांना रोखण्यासाठी, विकासासाठी नाही अशा शब्दांत राज्याच्या ग्रामविकास आणि महिला बालविकास मंत्री तथा जिल्हयाच्या पालकमंञी ना. पंकजाताई मुंडे यांनी राष्ट्रवादी काँग्रेसवर घणाघाती हल्ला चढवला.

    जिल्हा परिषद, पंचायत समिती निवडणूकीतील भाजपच्या उमेदवारांच्या प्रचारार्थ कडा (आष्टी), घाटशीळ पारगाव व चुंबळी फाटा येथे ना. पंकजाताई मुंडे यांच्या आज रेकाॅर्डब्रेक सभा झाल्या. सभेला मिळालेला अभूतपूर्व प्रतिसाद पाहता जिल्हा परिषदेवर भाजपचा झेंडा फडकल्याशिवाय राहणार नाही असे चित्र निर्माण झाले आहे.

    ना. पंकजाताई मुंडे यांनी आपल्या भाषणात राष्ट्रवादी काँग्रेसवर घणाघाती हल्ला चढवला. बारामतीच्या पुढाऱ्यांना निवडणूक आली तरच बीड जिल्हा आठवतो, त्यांना इथल्या विकासाशी कसलेही देणेघेणे नाही असे सांगून त्या म्हणाल्या की, बीड जिल्ह्यासह महाराष्ट्र राज्याला दुष्काळ मुक्त करण्यासाठी व बळीराजाला सुखी करण्यासाठी जलयुक्त शिवार अभियान सारखी यशस्वी योजना राबविली. दुष्काळी परिस्थितीत शेतकऱ्यांना पीक विमा संरक्षण व जनावरांसाठी चारा छावण्या सुरु करुन शासनाने शेतकऱ्यांना दिलासा देण्याचं काम केलं. राज्यभरात 35 हजार किमीचे रस्ते मुख्यमंत्री ग्राम सडक योजनेच्या माध्यमातून उभे करण्याचं उद्दिष्ट आहे.

    लोकनेते गोपीनाथराव मुंडे यांनी गरीब शेतकरी कुटुंबात जन्म घेतला भाजपच्या स्थापनेपासून पक्षात राहून त्यांनी राजकारणात गरूडझेप घेतली. केंद्रीय ग्रामीण विकास मंत्री होण्याचा मान या बीड जिल्ह्याच्या लोकांच्या पाठिंब्यावर त्यांनी मिळवला असे त्या म्हणाल्या.

    70 हजार कोटीत एक तरी बंधारा बांधला का?
    ———————————
    राष्ट्रवादी काँग्रेसने सत्ता असताना सिंचनाच्या नावाखाली 70 हजार कोटी हडप केले, हया कामात एक तरी बंधारा जिल्हयात बांधला का? असा सवाल ना. पंकजाताई मुंडेंनी भाषणात केला. दुष्काळी व मागासलेला जिल्हा म्हणून लागलेला कलंक पुसण्यासाठी सत्तेच्या माध्यमातून आपण जिल्हाभर करोडो रुपये खर्च करून जलसंधारण, कृषी, आरोग्य, शिक्षण यासह रेल्वे व दळण वळणाचे मोठे प्रकल्प पूर्ण करण्याचे काम हाती घेतले आहे. राज्याच्या ग्राम विकास मंत्रालयाचे सूत्र हाती घेतले तेव्हा राज्यभरात चार लाख कुटुंबियां कडे घरकुल बांधण्यासाठी स्वतः ची जागा नव्हती, तातडीने पंडित दीनदयाळ घरकुल अर्थ सहाय्य योजना आणून त्या कुटुंबियांना स्वतः ची जागा घेण्यासाठी अनुदान मंजूर केले असल्याचे सांगून जिल्हाभरात शुद्ध पिण्याच्या पाण्याचा पुरवठा करण्यासाठी फिल्टर प्रकल्प कार्यान्वित करण्यात येणार आहेत. ग्राम विकास विभागातुन राबविण्यात येणाऱ्या योजनांचे अनुदान थेट लाभार्थ्यांच्या बँक खात्यात जमा करत असल्याचे त्यांनी सांगितले. आम्ही विकासाचे राजकारण करत असल्यामुळे जिल्हा परिषदेत भाजपच्या उमेदवारांना प्रचंड मतांनी विजयी करा असे आवाहन त्यांनी केले. या सभेस आ.भीमराव धोंडे, माजी आमदार साहेबराव दरेकर, बाळासाहेब अजबे, विजय गोल्हार तसेच भाजपचे उमेदवार उपस्थित होते.

  • 16426128_1234756336609925_9020714848245145781_n

    भ्रष्टाचार मुक्त पुणे, तर हवे पवार मुक्त पुणे – पंकजा मुंडे

    पुणे : पुणे जिल्हा भ्रष्टाचार मुक्त करायचा असेल, तर तो पवार मुक्त केल्याशिवाय शक्य नाही, असं म्हणत ग्रामविकास मंत्री पंकजा मुंडे यांनी पवार कुटुंबियांवर निशाणा साधला.

    पुण्याच्या कामशेत येथे आयोजित मावळ तालुका भाजपा कार्यकर्त्यांच्या मेळाव्यात त्या बोलत होत्या. यावेळी भाजपा शहराध्यक्ष आणि आमदार बाळा भेगडे यांनी पुणे जिल्हा भ्रष्टाचार मुक्तचा नारा दिला. भ्रष्टाचाराने ज्यांचे हात आणि तोंड खरकटे झाले त्यांची आमच्यावर आरोप करण्याची लायकी नाही, असं म्हणत विरोधकांना देखील मुंडे यांनी लक्ष केलं.

  • WhatsApp Image 2017-01-20 at 2.49.10 PM

    गहिनीनाथ गडाच्या विकासासाठी निधीची कमतरता पडू देणार नही – पंकजा मुंडे

    वामनभाऊ यांच्या पदस्पर्शाने पावन झालेल्या गहिनीनाथ गडाच्या विकासासाठी निधीची कमतरता पडू दिली जाणार नाही, आगामी काळात रस्ते, पाणी पुरवठा, सभागृह या सुविधा दिल्या जातील अशी माहिती राज्याच्या ग्रामविकासमंत्री पंकजा मुंडे यांनी दिली आहे. बीड जिल्ह्यातील गहिनीनाथ गडावर आयोजित वामानभाऊंच्या ४१ व्या पुण्यतिथी महोत्सवास पंकजा मुंडे, खा.प्रीतम मुंडे, आमदार जयदत्त क्षीरसागर, भीमराव धोंडे यांची उपस्थिती यावेळी होती. गडाचे महंत विठ्ठल महाराज यांनी सर्वांचं स्वागत केलं. गहिनीनाथ गडाला मोठी अध्यात्मिक परंपरा आहे, दिवंगत लोकनेते गोपीनाथ मुंडे तसेच विलासराव देशमुख यांची गडावर श्रद्धा होती. गडाचा विकास हेच आपले ध्येय आहे असं सांगत परोपकार करा हा संतांचा संदेश आहे तर पराक्रम करून सत्तेचा वापर जनतेसाठी करा हा आमचा धर्म आहे असे पंकजा मुंडेनी यावेळी सांगितले. या महोत्सवासाठी राज्याच्या कानाकोपऱ्यातून लाखोंच्या संख्येने भाविक उपस्थित होते.

  • ef0e57032515a2def2edf064e5ab4ad5_L

    पंकजा मुंडे आणि डॉ.अनिल अवचट यांच्या हस्ते कला प्रदर्शनाचे उद्घाटन

    भारतीय परंपरेपासून ते अत्याधुनिक चारचाकी गाडयांपर्यंत रेखाटलेल्या पेटिंग्जमधून रंगांचा खळखळता प्रवाह अभिव्यक्त झाला. ग्रामीण जीवनशैली, राजस्थानी संस्कृती, केरळचे निसर्गसौंदर्य, अजिंठा लेण्यांमधील शिल्पकलांचे पेंटिंग आणि छायाचित्रांचे एकाच कलादालनात आयोजित प्रदर्शनात सादरीकरण होत असताना सूर्यास्त, पंढरीची वारी यांसारख्या छायाचित्रांनी देखील रसिकांना भूरळ घातली.

    निमित्त होते, एक कलाविष्कार या घोले रस्त्यावरील राजा रवी वर्मा आर्ट गॅलरीमध्ये आयोजित केलेल्या कला प्रदर्शनाचे. प्रदर्शनाचे उद्घाटन ग्रामविकास, महिला व बालकल्याण राज्यमंत्री पंकजा मुंडे आणि ज्येष्ठ सामाजिक कार्यकर्ते डॉ.अनिल अवचट यांच्या हस्ते झाले. यावेळी आमदार विजय काळे, रवि अनासपुरे, अभिनेते व दिग्दर्शक मिलिंद दास्ताने, नगरसेविका निलिमा खाडे, बाळासाहेब किरवे आदी उपस्थित होते. या प्रदर्शनात विनय जोशी, दिनेश किरवे, मोमिता निकम, भाग्यश्री गोडबोले, कैवल्य रंगारी व निशाद मानकर या कलाकारांच्या 150 कलाकृतींचा समावेश आहे.

    पंकजा मुंडे म्हणाल्या की, कॅमे-यामधील आधुनिक अविष्कारांमुळे चित्रांसमोरील आव्हान वाढले आहे. रसिकांसमोर आपल्या कलाकृतीची भूरळ कशी पडली पाहिजे, याचे आव्हान चित्र काढणा-या कलाकारांसमोर आहे. त्यामुळे त्यांच्या मेहनतीला आणि सातत्याला आपण प्रोत्साहन द्यायला हवे. कोणत्याही व्यक्तीमध्ये कला असली, तरी त्याला जगण्याची एक वेगळी दृष्टी मिळते. त्यामुळे तरुणांनी अशा वेगवेगळ्या कलांमधून आपले करिअर निवडायला हवे, असेही त्यांनी सांगितले.

    डॉ. अनिल अवचट म्हणाले की, भारतातील शिल्पकला ही प्रगत कला आहे. मात्र, चित्रकला तेवढी पुढे गेलेली नाही. कॅमे-याच्या माध्यमातून छायाचित्र तंतोतंत टिपले जाते. तसाच प्रयत्न चित्रकलेच्या माध्यमातून प्रकाश आणि सावलीच्या खेळांचे कॅनव्हासवर दर्शन घडवित, हे कलाकार करीत आहेत. छायाचित्रण कलेमुळे चित्रकलेला रस्ता बदलावा लागला असला, तरी अशा तरुण कलाकारांकडे पाहिले की दोन्ही कलांमधील फरक जवळपास संपलेला असल्याचे जाणवते, असेही त्यांनी सांगितले.

    हे प्रदर्शन रविवार,(22 जानेवारी) पर्यंत सकाळी 11 ते रात्री 8 यावेळेत हे प्रदर्शन विनामूल्य खुले असणार आहे. अभिमन्यू निकम यांनी सूत्रसंचालन केले. भाग्यश्री गोडबोले यांनी प्रास्ताविक केले. बाळासाहेब किरवे यांनी आभार मानले.

  • TNIMAGE49835beed-munde

    सामान्य माणसाच्या सर्वांगीण विकासासाठी शासन आणि प्रशासन प्रयत्नशील- पंकजा मुंडे

    अंबाजोगाई तालुक्यात विविध विकासकामांचा शुभारंभ

    बीड : सामान्य माणसाला केंद्रबिंदू मानून शासन विविध विकासाच्या योजना राबवित आहे. या योजनांच्या माध्यमातून सामान्य माणसापर्यंत विकास पोहोचवून त्यांच्या सर्वांगीण विकास करण्यासाठी शासन आणि प्रशासन प्रयत्नशील असल्याचे पालकमंत्री पंकजा मुंडे यांनी सांगितले.

    श्रीमती मुंडे यांच्या हस्ते अंबाजोगाई तालुक्यातील धानोरा बु., राडी, मुडेगाव आणि बर्दापूर या गावातील विविध विकास कामांचे लोकार्पण, भूमिपूजन आणि शुभारंभ करण्यात आले. यावेळी त्या बोलत होत्या. खासदार डॉ. प्रितम मुंडे, रमेश आडसकर, चाकूरचे माजी आमदार गोविंद केंद्रे यांची यावेळी विशेष उपस्थिती होती.

    श्रीमती मुंडे म्हणाल्या, यावर्षी परतीच्या पावसामुळे जिल्ह्यातील जलयुक्तच्या कामांमध्ये तसेच गावशिवारामध्ये मुबलक पाणी संचय निर्माण झाला आहे. त्यामुळे यावर्षीची पीक परिस्थिती चांगली आहे. शेतकऱ्यांच्या उत्पादित मालाला चांगला भाव मिळण्यासाठी चांगली बाजारपेठ उपलब्ध असणे गरजे आहे. त्यासाठी गावांना मुख्य मार्गाशी जोडणारे रस्तेही असणे तितकेच महत्वाचे असल्याने जिल्ह्यामध्ये मुख्यमंत्री ग्रामसडक योजनेच्या माध्यमातून रस्त्यांचे जाळे निर्माण करण्यात येत आहे. मुख्यमंत्री ग्रामसडक योजनेअंतर्गत परळी मतदारसंघात विशेष बाब म्हणून जास्त लांबीच्या रस्त्यांची कामे करण्यात येणार आहेत. या रस्त्यामुळे दळणवळण सुलभ व जलदगतीने होणार असल्याने शेतकऱ्यांचा आणि नागरिकांचा आर्थिक स्तर उंचावून पर्यायाने परळी मतदारसंघाच्या विकासाला निश्चितच चालना मिळणार आहे. तसेच सन 2018 पर्यंत रस्त्याचे एकही काम प्रलंबित राहणार नाही. रस्त्यांबरोबरच रेल्वेमार्गाच्या कामासाठी 2800 कोटी रुपयांचा निधी उपलब्ध झाला असल्याने लवकरच जिल्ह्यातून रेल्वे धावेल आणि त्या माध्यमातूनही जिल्ह्याच्या विकासाला चालना मिळणार असल्याचेही त्यांनी सांगितले.

    जिल्ह्यातील रस्त्यांसह शिक्षण, आरोग्य, स्वच्छता आदी मुलभूत सोयी-सुविधा पुरविण्यावरही भर देण्यात येत असून या सर्व योजनांच्या माध्यमातून ग्राम विकासाचा मार्ग सुकर होणार आहे. या सर्व योजनांसाठी मोठ्या प्रमाणामध्ये निधी उपलब्ध करुन देण्यात आलेला आहे. त्यामुळे या विकास योजना पूर्णत्वास नेण्यासाठी कोणती अडचण येणार नाही, अशी ग्वाही श्रीमती मुंडे यांनी दिली.

    शेतकऱ्यांना योग्य दाबाने आणि नियमित विद्युत पुरवठा करण्यासाठी नवीन विद्युत उपकेंद्रे, ट्रान्सफार्मर आदी उपलब्ध करुन देण्यात येणार आहेत. तसेच इंदिरा आवास योजना, संजय गांधी निराधार योजना आदी विशेष सहाय्य योजनांचा लाभ पात्र लाभार्थ्यांना देऊन त्यांचेही जीवनमान उंचावण्याचा प्रयत्न करण्यात येत आहे. विकास कामे करताना पदाधिकारी आणि अधिकारी यांनी समन्वयाने काम करावे. तसेच ही विकासाची कामे दर्जेदार झाल्यास याचा दीर्घकाळपर्यंत होणार असल्याने या कामांबाबत ग्रामस्थ, अधिकारी आणि पदाधिकारी यांनी दक्ष रहावे, अशी अपेक्षाही त्यांनी व्यक्त केली.

    यावेळी डॉ. मुंडे, श्री. केंद्रे यांनीही मनोगत व्यक्त केले. बर्दापूर येथील आत्महत्या केलेले शेतकरी वैजनाथ हाके यांच्या कुटुंबियांना मान्यवरांच्या हस्ते एक लाख रुपयाच्या मदतीच्या धनादेशाचे वितरणही करण्यात आले. यावेळी नेमाजी देशमुख, बिभीषण फड, जि.प. सदस्य गयाताई कराड, दत्ता पाटील, नरसिंग कदम, शिवाजी मोरे, प्रदीप गंगणे, श्रीमती शारदाताई गंगणे यांच्यासह अंबाजोगाईचे उपविभागीय अधिकारी शिवकुमार स्वामी, तहसीलदार शरद झाडके, जलसंधारण विभागाचे उप अभियंता एच.आर.मुंडे यांच्यासह जोडवाडी, उजनी, पट्टीवडगाव परिसरातील पदाधिकारी, नागरिक यांची उपस्थिती होती.

    विकास कामांचा शुभारंभ

    श्रीमती मुंडे यांच्या विकासपर्व दौऱ्यात धानोरा बु. येथील वाघाळा-राडी-धानोरा या 56 कि.मी. रस्त्याचे 30 लाख रुपये खर्चून करण्यात येणाऱ्या डांबरीकरण व नूतनीकरण कामाचे भूमिपूजन, प्रवासी निवाऱ्याचे लोकार्पण करण्यात आले. तर मुडेगाव येथील 6 लाख खर्चून बांधण्यात येणाऱ्या अंगणवाडी बांधकाम, मंदिरासमोर 3 लाख खर्चून पेव्हर ब्लॉक बसविणे आणि दलितवस्तीमध्ये 6 लाख रुपये खर्चून बांधण्यात येणाऱ्या सभागृह बांधकाम आदी कामांचे भूमिपूजन करण्यात आले.

    बर्दापूर येथील गावांतर्गत रस्ते बांधकामाचे भूमिपूजन आणि प्रवासी निवाऱ्याचे लोकार्पणही करण्यात आले. तसेच राडी येथील कब्रस्तान संरक्षक भिंत बांधकामचे भूमिपूजन, रस्ता बांधकाम आणि प्रवासी निवाऱ्याचे लोकार्पण करण्यात आले.

  • thequint_2016-01_738667ba-5d09-4b99-ab33-1736b1641b10_dsc00088

    निरुपयोगी प्लास्टिक रस्त्यांच्या कामांना वापरणार-पंकजा मुंडे

    मुख्यमंत्री ग्रामसडक योजनेत प्लास्टिक बंधनकारक

    निरुपयोगी झालेले प्लास्टिक आता रस्त्यांच्या कामांमध्ये वापरण्याचा निर्णय राज्य शासनाने घेतला आहे. ‘मुख्यमंत्री ग्रामसडक योजनें’तर्गत बांधण्यात येणाऱ्या रस्त्यांमध्ये निरुपयोगी प्लास्टिक वापरणे बंधनकारक करण्यात आल्याची घोषणा ग्रामविकास मंत्री पंकजा मुंडे यांनी केली.

    मुख्यमंत्री ग्रामसडक योजनेअंतर्गत जी कामे ५ लक्ष लोकसंख्येच्या शहरापासून ५० कि.मी. त्रिज्येच्या आत असतील अशा रस्त्यांच्या डांबरीकरणाच्या कामात निरुपयोगी प्लास्टीकचा वापर बंधनकारक करण्यात येणार असून त्यापेक्षा जास्त अंतरासाठी काम केल्यासही त्याचे स्वागतच करण्यात येईल असे पंकजा मुंडे यांनी सांगितले. सह्याद्री राज्य अतिथीगृह येथे ‘मुख्यमंत्री ग्रामसडक योजनेंतर्गत निरुपयोगी प्लास्टीकचा वापर’ या संबंधित आयोजित बैठकीनंतर त्यांनी ही माहिती दिली.

    पंकजा मुंडे पुढे म्हणाल्या की, प्लास्टीक घनकचरा व घनकचऱ्याची सुरक्षितपणे विल्हेवाट करण्यासाठी उपाययोजना करणे गरजेचे आहे. तसेच रस्त्याच्या डांबरीकरणाच्या कामात निरुपयोगी प्लास्टीकचा वापर केल्याने रस्त्याच्या टिकाऊपणामध्ये होणारी वाढ होत असल्याचे दिसून आले आहे. शिवाय रस्त्यांच्या डांबरीकरणाच्या कामासाठी येणाऱ्या खर्चापेक्षा निरुपयोगी प्लास्टीकचा वापर केल्यास ८ ते १० टक्के बचत होऊ शकणार आहे. यामुळे केंद्रीय ग्रामविकास मंत्रालयानेही पंतप्रधान ग्रामसडक योजनेच्या कामातही उष्णमिश्रीत डांबरीकरणात निरुपयोगी प्लास्टीकचा वापर करण्यास सुरुवात केली असल्याची माहिती मुंडे यांनी यावेळी दिली.

  • mnaimage93772pankaja-munde

    चिक्की घोटाळा प्रकरणी पंकजा मुंडे यांना क्लीनचीट

    मुंबई- भाजपा सरकारमधील पहिला घोटाळा म्हणून गाजलेल्या महिला आणि बाल विकास विभागातील चिक्की घोटाळा प्रकरणी पंकजा मुंडे यांना लाचलुचपत प्रतिबंधक विभागाने क्लीनचीट देत फाईल बंद केली आहे. तसा अहवाल लाचलुचपत प्रतिबंधक विभागाने गृह विभागाकडे पाठविला आहे. या प्रकरणी राष्ट्रवादी काँग्रेस न्यायालयात दाद मागणार असल्याचे प्रवक्ते नवाब मलिक यांनी सांगितले.

    महिला आणि बाल विकास विभागातर्फे राज्यातील अंगणवाडय़ांतील मुलांसाठी पोषण आहार म्हणून खरेदी केलेल्या चिक्की घोटाळय़ात मोठय़ा प्रमाणात भ्रष्टाचार झाल्याचे आरोप विधिमंडळात आणि विधिमंडळा बाहेर झाले होते. चिक्की खरेदी करताना ई टेंडरींगचा वापर केला नाही, एकाच दिवसांत २४ कंत्राटे दिली, वितरित करण्यात आलेली चिक्की सदोष आहे, ज्या कंत्राटदाराला चिक्की निर्मितीचे आणि वितरणाचे कंत्राट दिले आहे, त्यांच्याकडे ती यंत्राणाच नाही, असे आरोप करण्यात आले होते.

    या प्रकरणी चौकशी करण्याचे आदेश मुख्यमंत्री देवेंद्र फडणवीस यांनी लाचलुचपत प्रतिबंधक विभागाला दिले होते. लाचलुपचपत विभागाने चौकशी करून आपला अहवाल गृह विभागाला पाठविला असून त्यात कोणताही ठपका ठेवलेला नाही. काही संशयास्पद नसल्याने ही फाईल बंद करीत असल्याचेही लाचलुचपत प्रतिबंधक विभागाने गृह विभागाला कळविले आहे.

  • pankaja-munde-1

    अंगणवाडी सेविका व मदतनीसांचे मानधन ऑनलाईन पद्धतीने देण्यात येणार – पंकजा मुंडे

    नागपूर,(प्रतिनिधी)राज्यातील अंगणवाडी सेविका व मदतनीस यांना त्यांचे मानधन देण्यास विलंब होऊ नये यासाठी त्यांचे आधारकार्ड लिंक करुन ऑनलाईन पद्धतीने त्यांच्या बँक खात्यात जमा करण्यात येईल.मूर्तिजापूर, जि. अकोला येथील अंगणवाडी सेविका व मदतनीस यांचे मानधन देण्यास विलंब करणाऱ्या लिपिकास निलंबित करण्यात आले असून अधिक चौकशीत तो दोषी आढळल्यास त्यास बडतर्फ करु, अशी माहिती महिला व बाल विकास मंत्री पंकजा मुंडे यांनी आज विधानसभेत दिले.

    याबाबतचा प्रश्न सदस्य गोवर्धन शर्मा यांनी विचारला होता. या प्रश्नाला उत्तर देताना त्या बोलत होत्या. यावेळी बोलताना श्रीमती मुंडे म्हणाले की, एकात्मिक बाल विकास योजना मुर्तिजापूर, जि. अकोला कार्यालयातील देयके तयार करणारे कनिष्ठ सहाय्यक अनधिकृतपणे गैरहजर असल्याने अंगणवाडी सेविका व मदतनीसांचे मानधन देण्यास विलंब झाला होता. आता सर्वांचे मानधन देण्यात आले असून यापुढे विलंब होऊ नये यासाठी त्यांचे आधारकार्ड लिंक करुन ऑनलाईन पेमेंट करण्यात येणार आहे. या प्रकरणी संबंधित कर्मचाऱ्यांस निलंबित करण्यात आले असून त्याचे यापूर्वीचे रेकॉर्ड व वर्तणूक तपासून त्यास आवश्यकता भासल्यास त्यास सेवेतून बडतर्फ करण्यात येईल, असेही त्यांनी यावेळी सांगितले. या प्रश्नाच्या चर्चेत सदस्य सर्वश्री हरिश पिंपळे, जयंत पाटील, पांडुरंग वरोरा आदी सदस्यांनी सहभाग घेतला.

  • 15267878_1165569166861976_5331443061911820281_n

    बाबासाहेबांचे विचार आजही मार्गदर्शक – पंकजा मुंडे

    मुंबई : महिलांचे राजकीय, सामाजिक, शैक्षणिक, आर्थिक स्वातंत्र आणि स्थैर्य महामानव डॉ. बाबासाहेब आंबेडकर यांनी दिलेल्या संविधानामुळे आहे. स्वातंत्र्यानंतरही देशाला बाबासाहेबांचे विचार प्रेरणादायी ठरत आहेत, असे महिला व बालविकास मंत्री पंकजा मुंडे यांनी आज येथे सांगितले.

    भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त दादर येथील चैत्यभूमी येथे महामानव डॉ.बाबासाहेब आंबेडकर यांना श्रीमती मुंडे यांनी पुष्पअर्पण करून अभिवादन केले, त्यावेळी त्या बोलत होत्या.

    श्रीमती मुंडे म्हणाल्या की, डॉ. बाबासाहेब आंबेडकरांनी अतिशय संघर्ष करून समाजात शैक्षणिक, सामाजिक, राजकीय प्रगती घडवून आणली. समाजातील दुर्बल घटकाला मुख्य प्रवाहात आणले तसेच महिलांसाठीचे त्यांचे कार्य फार मोलाचे आहे. आज महिलांना राजकीय, सामाजिक, शैक्षणिक आणि आर्थिक स्वातंत्र्य मिळाले आहे. त्यांचे विचार आजही प्रेरणादायी असून, भविष्यातही मार्गदर्शक ठरतील.

Page 3 of 2912345...1020...Last »